Elordi dantza taldeak 10 urte bete ditu

Zizur Nagusiko Elordi dantza taldeak 10. urteurrena ospatuko du apirilaren 14ean. Hainbat ekimen prestatu ditu urtemugaren kariaz, eta dantzarekin batera, bazkaria eta kontzertuak ere izanen dira Zizur Nagusian. Egunari hasiera emateko kalejira eginen dute alde zaharreko karriketan. Eguerdian bazkari herrikoia eta Garazi Goienetxe kantautorearen kontzertua. Arratsaldean Barañaingo Batukadak alaituko ditu Zizur Nagusiko karrikak, eta eguna bukatzeko kontzertuak antolatu dituzte . Bazkarirako txartelak 10 euro balio du, kontzertuetarako sarrerak 5 euro eta biak batzen dituen bonoak 13 euro.
Aunitz urtez Elordi!

70. urteurrena publikoari eskainiko dio Oberena dantza taldeak

1941. urtean sortu zen euskal dantza taldea, eta, oraindik orain, sasoi onean jarraitzen du, etorkizunari sendotasunez so eginez. Urteurrena dela eta, hainbat ekitaldi prestatuko ditu taldeak. 'Zorionak, zuri. Gracias por estar ahí' lelopean, ospakizuna publikoari eskaini nahi dio Oberena dantza taldeak. Izan ere, ikuslerik gabe ezinezko baita Oberena dantza taldeak aurrera egitea. Taldeak lan publikoa egiten du, ikuslearen gozamenerako, eta urte guzi hauetan harmailatik zein plazako txokotik gure oinei so izan diren guzi horiei eskerrak eman nahi dizkio dantza taldeak.

Oberena dantza taldea 2010eko abenduaren 3an

70. urteurrenaren kariaz, honako ekitaldiak antolatuko ditu Oberena dantza taldeak: dantzari ttikien ikusgarria, dantzari nagusien ikusgarria, kamisetak eta abenduaren 3ko dantzaldi berezia.

Ttikien ikusgarria azaroaren 19an izanen da, Nafarroako Antzerki Eskolan. 'Lizarren Doinua' obra eskainiko dute dantzari ttikiek, dantza eta antzerkia uztartzen dituena.

Kamisetei dagokionean, Kukuxumuxuk prestaturiko marrazkiarekin atonduko dira. Hainbat neurrikoak izanen dira, eta salgai paratuko dira egun berezietan (abenduaren 3a kasu).

Abenduaren 3an, urtero bezala, Oberenako dantzarien eguna ospatuko da. Ohi denez, belaunaldi guzietako dantzariak bilduko dira Oberena Kirol Elkartean, baita dantzatzeari utzi ziotenak ere. Aurten sorpresatxoren bat izanen da emanaldi berezi honetan, 70. urteurrenaren kariaz, eta, beti ere, ikuslegoari esker ona adierazteko.

Azkenik, dantzari nagusien ikusgarria dugu. Horren berri aurrerago emanen dugu.

Iturria: Oberena dantza taldea
Diario de Noticias

En castellano