ALKE Leitzako Kultur Taldeak bertako pestetako egitarauak paratu ditu interneten. 1903. urteko programa da lehenbizikoa, ezkerreko irudian ikus dezakezuena, eta 1917tik aitzina pdf formatuan jeitsi daitezke. Gerra aitzineko eta ondoko programak biltzen dira eta urte luze hauetan pestek izan duten bilakaera aztertu daiteke.1940. urtetik aitzina ale guziak daude, lehenagokoen artean baina saltoak daude eta ez dituzte urte guzietakoak bildu. Musika eta dantza betidanik izan dira Leitzako pestetako protagonista. Hala, 1903an punta-puntako bertsolariak izan zituzten herrian: Lazaro, Txirrita eta Pello Errota. Dantzariak ere ageri zaizkigu eta dantzari txikiek 1930ean lehenbizikoz dantzatu zutela esaten du orduko programak.
